CNF Writing Exercise: Exercise on Rhetorical
Techniques

Ngayong mga nagdaang araw, nahahanap ko ang aking sarili na tumatambay sa balkonahe sa labas ng aking munting kwarto. Mga Marso noon nang nagsimulang umabot ang pagiging plantita ng aking nanay mula sa aming halamanan sa unang palapag (ng aming bahay) papunta sa aming terasa, kaya ang dating walang kalaman-laman na balkonahe ay naging isang munting hardin na binibisita ng aking ina araw-araw upang diligan. Sari-sari ang mga halaman dito: may mga kalachuchi, bellflower, pothos, silver queen, at iba pang mga halaman na hindi ko na mapangalanan. Ang resulta, tuloy, ay isang terasa na may preskong simoy ng hangin, maaliwalas na kapaligiran, at magandang tanawin lalo na tuwing sisikat at lulubog ang araw.

Pumapalagi ako sa aming balkonaheng hardin tuwing pakiwari ko ay gusto ko lang pumunta. Minsan, kinakausap ko ang aking mga kaibigan dito sa pamamagitan ng Discord, kalimitan ay kinukunan ko ito ng larawan lalo na kapag sobrang ganda ng langit at mga ulap, ngunit madalas ay ang balkonaheng ito ang aking pahingahan mula sa maingay at nakakabahalang saloobin na pinapaalala sa akin ng aking silid. Noong ika-sampung baitang ng hayskul ay palagi kong ginustong lumisan sa nakakasakal na pakiramdam na binibigay sa akin ng kwartong ito dahil naaalala ko ang labis na kalungkutang naranasan nang maghiwalay kami ng kasintahan ko noon. Wala man akong kasintahan ngayon, bumabalik-balik pa rin ang pakiramdam ng pagkakasakal dahil sa sitwasyon natin — parating nakakulong sa bahay, iniisip kung ano na ang mangyayari sa atin at sa bansa, habang nalulunod sa mga gawain mapa-trabaho man o eskwelahan. Wala nang lugar at wala nang pagitan ang personal at propesyonal nating mga buhay, wala nang space para makahimlay. Kaya, ang balkonaheng ito ang natatanging paraan upang makatakas ako mula sa mga bumabahala sa aking isipan, at ito lamang ang lugar kung saan pwede akong tumingin sa kawalan, mangarap, at makalaya. Gusto kong makalaya.

filtered out word vomits

filtered out word vomits